Shiva Temples of Tamilnadu
தேவாரப் பாடல் பெற்ற சிவஸ்தலங்கள்
வெண்ணையப்பர் கோவில், திருநெல்வெணெய்
தென்னாடுடைய சிவனே போற்றிஎந்நாட்டவர்க்கும் இறைவா போற்றி
| தகவல் பலகை | |
|---|---|
| சிவஸ்தலம் பெயர் | திருநெல்வெணெய் (தற்போது நெய்வணை என்று வழங்குகிறது) |
| இறைவன் பெயர் | வெண்ணையப்பர், சொர்ணகடேஸ்வரர் |
| இறைவி பெயர் | நீலமலர்க்கன்னி |
| பதிகம் | திருஞானசம்பந்தர் - 1 |
| எப்படிப் போவது | விழுப்புரம் மாவட்டத்திலுள்ள உளுந்தூர்பேட்டையிலிருந்து கள்ளக்குறிச்சி செல்லும் சாலையில் எலவானாசூர் வந்து பின் அங்கிருந்து திருக்கோவிலூர் செல்லும் சாலையில் எறையூர் வந்தடைந்து அங்கிருந்து பிரியும் பாதையில் வடகுரும்பூர் வழியாக 4 கி.மீ. தொலைவில் உள்ள நெய்வெணையை அடையலாம். எறையூரிலிருந்து நெய்வெணை செல்ல நகரப் பேருந்து உள்ளது. |
| ஆலய முகவரி |
அருள்மிகு வெண்ணையப்பர் திருக்கோவில் நெய்வணை கிராமம், கூவாடு அஞ்சல் வழி எறையூர், உளுந்தூர்பேட்டை வட்டம் விழுப்புரம் மாவட்டம் PIN - 607201 இவ்வாலயம் தினந்தோறும் காலை 6 மணி முதல் 9 மணி வரையிலும், மாலை 4 மணி முதல் இரவு 8 மணி வரையிலும் திறந்திருக்கும். கோவில் குருக்கள் வீடு அருகிலேயே உள்ளது. |
முகப்பு வாயில் மட்டுமே கொண்டு இவ்வாலயம் அமைந்துள்ளது. கோயிலின் முன் நந்தி மட்டுமே உள்ளது. கொடிமரமில்லை. முகப்பு வாயில் கடந்து உள்ளே சென்றால் நேரே மூலவர் சந்நிதி அமைந்துள்ளது. மூலவர் சந்நிதி வாயிலின் வெளியே திருமால் சங்கு சக்ரதாரியாகத் திருமகளுடன் அழகாகக் காட்சி தருகிறார். துவாரபாலகரை தொழுது உள்வாயில் கடந்து உள்ளே சென்றால் கருவறையில் சிவன் சுயம்பு லிங்கமாக ருத்ராட்ச பந்தலின் கீழ் அருட்காட்சி தருகிறார். ஒவ்வொரு வருடமும் மாசி மாதத்தில் மகாசிவராத்திரியன்று அதிகாலையில் இறைவன் திருமேனி மீது சூரிய ஒளி விழுகிறது. சனகர், சனகாதி முனிவர்கள் நால்வரும் சுவாமியை பூஜித்து வணங்கியுள்ளனர்.
வெளிப் பிராகாரத்தில் விநாயகர் சந்நிதியுள்ளது. அதையடுத்து வள்ளி தெய்வயானை உடனாகிய ஆறுமுக சுவாமி மயில் வாகனத்துடன் காட்சி தருகிறார். அம்பாள் சந்நிதி தனிக் கோயிலாகப் பக்கத்தில் உள்ளது. அம்பாள் நீலமலர்க்கன்னி கிழக்கு நோக்கி நின்ற திருக்கோலத்தில் காட்சி தருகிறாள். அம்பாள் சந்நிதிக்கு வெளியே நேர் எதிரில் தேவார மூவர் சந்நிதி உள்ளது. சுந்தரர் நடுவிலும் இருபுறங்களிலும் அப்பரும் ஞானசம்பந்தரும் உள்ளனர். ஞானசம்பந்தர் கையில் தாளமின்றி, கை கூப்பிய நிலையிலும், சுந்தரர், நடன சுந்தரராகவும் காட்சி தருகின்றார்.
இத்தலத்து கல்வெட்டு ஓன்றில் இத்தல இறைவன் பெயர் "பொற்குடங் கொடுத்தருளிய நாயனார்" என்று குறிப்பிடப்பட்டுள்ளது. இன்றைய வழக்கில் வடமொழிப் பெயரான சொர்ணகடேஸ்வரர் என்று அழைக்கப்படும் இத்தல இறைவனை வணங்கி வழிபடுவர்களுக்கு செல்வத்தை வாரி வழங்கக் கூடியவர்.
திருஞானசம்பந்தர் இயற்றியுள்ள இத்தலத்திற்கான இப்பதிகம் மூன்றாம் திருமுறையில் இடம் பெற்றுள்ளது.
1. நல்வெணெய் விழுதுபெய் தாடுதிர் நாடொறும் நெல்வெணெய் மேவிய நீரே நெல்வெணெய் மேவிய நீருமை நாடொறுஞ் சொல்வணம் இடுவது சொல்லே. 2. நிச்சலும் அடியவர் தொழுதெழு நெல்வெணெய்க் கச்சிள அரவசைத் தீரே கச்சிள அரவசைத் தீருமைக் காண்பவர் அச்சமொ டருவினை யிலரே. 3. நிரைவிரி தொல்புகழ் நெல்வெணெய் மேவிய அரைவிரி கோவணத் தீரே அரைவிரி கோவணத் தீருமை யலர்கொடு உரைவிரிப் போருயர்ந் தோரே. 4. நீர்மல்கு தொல்புகழ் நெல்வெணெய் மேவிய ஊர்மல்கி உறையவல் லீரே ஊர்மல்கி உறையவல் லீருமை யுள்குதல் பார்மல்கு புகழவர் பண்பே. 5. நீடிளம் பொழிலணி நெல்வெணெய் மேவிய ஆடிளம் பாப்பசைத் தீரே ஆடிளம் பாப்பசைத் தீருமை அன்பொடு பாடுளம் உடையவர் பண்பே. 6. நெற்றியோர் கண்ணுடை நெல்வெணெய் மேவிய பெற்றிகொள் பிறைநுத லீரே பெற்றிகொள் பிறைநுத லீருமைப் பேணுதல் கற்றறி வோர்கள்தங் கடனே. 7. நிறையவர் தொழுதெழு நெல்வெணெய் மேவிய கறையணி மிடறுடை யீரே கறையணி மிடறுடை யீருமைக் காண்பவர் உறைவதும் உம்மடிக் கீழே. 8. நெருக்கிய பொழிலணி நெல்வெணெய் மேவியன் றரக்கனை யசைவுசெய் தீரே அரக்கனை யசைவுசெய் தீருமை யன்புசெய் திருக்கவல் லாரிட ரிலரே. 9. நிரைவிரி சடைமுடி நெல்வெணெய் மேவியன் றிருவரை யிடர்கள்செய் தீரே இருவரை இடர்கள்செய் தீருமை யிசைவொடு பரவவல் லார்பழி யிலரே. 10. நீக்கிய புனலணி நெல்வெணெய் மேவிய சாக்கியச் சமண்கெடுத் தீரே சாக்கியச் சமண்கெடுத் தீருமைச் சார்வது பாக்கியம் உடையவர் பண்பே. 11. நிலமல்கு தொல்புகழ் நெல்வெணெய் ஈசனை நலமல்கு ஞானசம் பந்தன் நலமல்கு ஞானசம் பந்தன செந்தமிழ் சொலமல்கு வார்துய ரிலரே.